КӘСІПОРЫН ҚАЛА ТҰРҒЫНДАРЫНА ҚАЙЫРЫМДЫЛЫҚ КӨМЕК КӨРСЕТТІ

    «Қайырымдылық жасасаң, қайырын өзің көресің» дейді қазақ даналығы. Баршаға белгілі, жоқ-жітікке қарасу, жылағанды жұбату, сүрінгенді сүйеу, мұқтаждардың талған өзегіне талғажау табу – халқымыздың бойында ежелден қалыптасқан қасиет.
Адам бар жерде тұрмыстық түйткілдердің туындамауы мүмкін емес. Ата-бабамыз осындай қысқа жіп күрмеуге келмейтін қысылтаяң шақтарда ауызбіршілікті, адалдықты, ынтымақты ту етіп көтерген. Әсіресе, көптің мәселесін қара бастың қамынан жоғары қойып, қолында барды жомарттықпен өзгемен бөлісе білген.
Осы орайда, Қызылорда облысының ғана емес, еліміздің әлеуметтік-экономикалық дамуына өзінің зор үлесін қосып келе жатқан компаниялардың бірі де бірегейі «ТОРҒАЙ-ПЕТРОЛЕУМ» акционерлік қоғамы Қызылорда қаласындағы халықтың әлеуметтік осал тобына жататын тұрмысы төмен отбасыларға қайырымдылық көмек көрсетіп, азық-түлік қоржындарын таратты.
Аталған қайырымдылық көмекті Компанияның Бас директоры Дәурен Әбілқайыров бастап таратты. Онымен бірге «Amanat» партиясы Қызылорда қалалық филиалы мен қалалық жұмыспен қамту және әлеуметтік бағдарламалар бөлімінің мамандары бірге болды.
– Қамқорлыққа зәру жандардың қамқоршысы болып, жылы сөз, жүрек жылуын ұсынып, ізгілік нұрын шашып, демеушілік көрсетіп жүрген Сіздей жомарт жанның еңбегіне табыс, отбасына амандық тілеймін! «Жаңбырменен жер көгерер, алғыспенен ел көгерер» демекші, ел алғысына бөленіп жүре беріңіз! – деп ризашылығын білдірді аталған көмекке ие болған Тасбөгеттік тұрғынның бірі.